Uztailaren 4an Kooperatiben Nazioarteko Eguna ospatzen da. Aurten, mugimendu kooperatiboak kooperatibek gizarte baketsuagoak, bidezkoagoak eta kohesionatuagoak eraikitzeko duten gaitasuna jarri du erdigunean.
Ametxen, ideia hori oso modu zehatzean bizi dugu: etxean, egunerokoan, lurrarekin harremanean eta komunitatea eraikiz.
Guretzat, kooperatibismoa ez da formula juridiko bat edo antolatzeko modu bat bakarrik. Bizitzeko praktika bat da: zaintzeko, erabakitzeko, ikasteko eta elkarrekin eusteko modu bat. Etxebizitza kooperatiboaren bidez, etxea ondasun pribatu hutsa izateari utzi eta bizitza partekatzeko, harremanak zaintzeko eta lurraldearekin lotura berriak sortzeko espazio bihurtzen da.
Ametxen, kooperatibismoa zentzu guztietan lantzen da: etxea zainduz, baratzea landuz, tresnak partekatuz, erabakiak hartuz, gatazkak entzunez, enpatia praktikatuz, lanak banatuz eta eguneroko bizitza komunitatean sostengatuz.
Landa-eremuan bizi-proiektu kolektibo bat eraikitzeak aukera asko zabaltzen ditu, baina erronkak ere badakartza. Horregatik, guretzat, kooperatibismoa ez da helmuga itxi bat, baizik eta egunero berritzen den bidea: pazientziaz, konfiantzaz eta elkar zaintzeko borondatez egiten den bidea.
Gaur, Kooperatiben Nazioarteko Egunean, aldarrikatu nahi dugu bestelako etxebizitza-ereduak posible direla. Eta beharrezkoak ere badirela.
Etxea, lurra eta komunitatea elkarrekin zaintzea ere bada mundu baketsuagoa eraikitzeko modu bat.
Kooperatibismoa etxean lantzen da.
Ametxeren argazkia, Laboral Kutxaren «Elkarlana» kanpainakoa.
